Ыччат нэдиэлэтэ көхтөөхтүк ааста

И.М.Сосин аатынан улуустааҕы киин библиотекаҕа сэтинньи 14 күнүгэр «Сүбэ холбуката» диэн ааттаммыт эдэр ыччат декадатын чэрчитинэн аһаҕас аан күнэ ыытылынна. Бу күн улууспут эдэр ыала, ыччат дьон кыттыыны ылан дьиэлэнэргэ туһуламмыт анал ханнык программалар баалларын, ипотеканы эдэр ыал хаһан, хайдах туһаныан сөбүн, итиэннэ үбү-харчыны хайдах гынан сөпкө аттарыныахха сөбүн уонна «Тайм менеджмент» диэн туһунан элбэҕи билэн бардылар. Улуустааҕы эдэр ыччат, дьиэ кэргэн управлениетыттан, Майатааҕы дьиэ кэргэн кииниттэн, сбербаан уонна россельхозбаан, алгыскредит, алмазкредитсервис салайааччылара уонна специалистара кыттыыны ыллылар. Интэриэһиргээбит ыччат, эдэр ыал бэйэлэрин ыйытыыларын биэрэн хоруйдары ыллылар.

 

Сэтинньи 19 күнүгэр Аллараа Бэстээхтээҕи Транспортнай техникум устудьуоннарыгар ыччат нэдиэлэтин чэрчитинэн киин библиотека үлэһиттэрэ уонна Моорук нэһилиэгиттэн олохтоох кулууп дириэктэрэ Римма Романова, уус – уран салайааччы Нарыйа Иванова уонна библиотекарь Александр Иванов кыттыылаах «И.М.Сосин – норуот муудараһын кэрэһитэ» диэн ааттаммыт литературнай музыкальнай салон ыытылынна. Тэрээһиҥҥэ барыта 150-тан тахса устудьуон сылдьан иһиттилэр, поэт, биир дойдулаахпыт Иннокентий Михайлович Сосин туһунан элбэҕи биллилэр.

Сэтинньи 20 күнүгэр үтүө үгэскэ кубулуйбут эдэр эрчимнээх ыччакка анаммыт «Квиз оонньуу»  өркөн өй  оонньуута ыытылынна. Манна 8 хамаанда кыттыыны ылла: улуустар икки ардыларынааҕы нолуок сулууспатын инспекцията, ОДьКХ, «Мэҥэ кэскилэ» оҕолор хамаандалара, сбербаан, культура, Ларионов аатынан Майатааҕы орто оскуола, Ф.Г. Охлопков аатынан Майатааҕы 2-с оскуола уонна улуустааҕы киин балыыһа. Оонньууну оройуон дьаһалтатын административнай хамыыһыйатын бэрэссэдээтэлэ Феликс Титов салайан ыытта. Бэлиэтээн эттэххэ, оонньуу Улуу Кыайыы 75 сылыгар ананна. Улуустар икки ардыларынааҕы нолуок сулууспатын инспекциятын эдэр специалистара ордук бэлэмнээхтэрин көрдөрөн, кыайыылааҕынан ааттаннылар.

 

Сэтинньи 21 күнүгэр киин библиотека правовой информация киинин үлэһитэ Светлана Федорова Майатааҕы лицей үөрэнээччилэригэр «Юный правовед» диэн ааттаммыт оонньууну ыытта. Манна барыта 55 оҕо кыттыыны ылан, билиилэрин хаҥаттылар, элбэҕи биллилэр. Барыта 6 хамаанда оонньообутуттан кыайыылааҕынан «Винкс» хамаанда таҕыста.

 

Бу курдук, Ыччат нэдиэлэтэ И.М.Сосин аатынан улуустааҕы киин библиотекаҕа бэрт сэргэхтик, элбэх ааҕааччыны хабан ыытылынна.