Василий Васильевич Скрябин саҥа кинигэтин сүрэхтэниитэ

Балаҕан ыйын 2 күнүгэр СӨ Судаарыстыбаннаһын күнүн көрсө Ходоро нэһилиэгэр СӨ норуот хаһаайыстыбатын үтүөлээх үлэһитэ, оройуон Бочуоттаах гражданина, бөдөҥ судаарыстыбаннай-уопсастыбаннай деятель Василий Скрябин төрөөбүтэ 75 сылынан тахсыбыт ахтыы кинигэтэ сүрэхтэннэ. Кинигэ «Бичик» кинигэ кыһатыгар «Саха сирин киэн туттар дьоно» сиэрийэнэн таҕыста.

Кинигэ сүрэхтэниитэ «Сандаара» култуура киинигэр ыытылынна. Биир дойдулаахтара, бииргэ үлэлээбит, алтыспыт дьоно-сэргэтэ, дьиэ кэргэнэ саалаҕа толору мустан үтүө киһи туһунан истиҥник кэпсэтистилэр. Тэрээһини Ленин аатынан сопхуоска бииргэ үлэлээбит доҕоро, ЫБМ сулууспатын бэтэрээнэ Егор Матчитов салайан ыытта. Киин бибилэтиэкэттэн Аграфена Зыкова саҥа кинигэ туһунан сырдатта. Бэлиэтээн эттэххэ, саҥа кинигэни оройуон дьаһалтата үбүлээн бэчээттээн таһаарда.

Дьокуускайтан СӨ норуотун хаһаайыстыбатын үтүөлээх үлэһитэ, доҕоро Матвей Мучин, оройуон дьокутааттарын Сэбиэтин бэрэссэдээтэлэ Павел Сазонов, Ытык сүбэ бэрэссэдээтэлэ Василий Эверстов, СӨ, РФ култуураҕа туйгуна Василий Винокуров, Ходоро нэһилиэгин баһылыга Алексей Васильев, Ленин аатынан сопхуоска хомсомуол сэкирэтээринэн үлэлээбит Александра Николаева,  Василий Васильевич кэргэнэ Фаина Илларионовна, оҕолоро, аймахтара ахтан-санаан аастылар. Кинигэ сүрэхтэниитин эҕэрдэ нүөмэрдэр киэргэттилэр. Бу күн наҕараадалар туттарылыннылар.