Туругура тупса тур, сарыал санаам – Сахам тыла!

1996 сыллаахха Саха Өрөспүүбүлүкэтин бастакы Президенэ М.Е.Николаев олунньу 13 күнүн төрөөбүт тыл уонна сурук-бичик күнүнэн биллэрбитэ. Сыллата өрөспүүбүлүкэбит араас муннуктарыгар Ийэ тыл күнүгэр аналлаах үгүс тэрээһиннэр ыытыллан кэллилэр. Биьиги оройуоммутугар бу күнү көрсө Ийэ тылбытын үйэтитэр сыаллаах араас хайысхалаах тэрээһиннэр ыытылыннылар.

Олунньу 13 күнүгэр төрөөбүт тыл уонна сурук-бичик күнүгэр аналлаах И.М.Сосин аатынан киин библиотекаҕа «Туругура тупса тур, сарыал санаам — Cахам тыла» диэн ааттаммыт улуустааҕы хоһоон ааҕыытыгар куонкурус киэң далааһыннаахтык ыытылынна. Тэрээһини И.М.Сосин аатынан улуустааҕы киин библиотека, Мэңэ-Хаңалас оройуонун культураҕа уонна духуобунай сайдыыга салалтата итиэннэ улуустааҕы ыччат, дьиэ кэргэн салалтатын көҕүлээһиннэринэн ыытыллыбытын бэлиэтиир тоҕоостоох. Ити курдук, улуустааҕы хоһоон ааҕыытын куонкуруһа 9-11 кылаас үөрэнээччилэрин, итиэннэ 18-35 диэри саастаах эдэр ыччат ортотугар ыытылынна. Кыттааччылар «Иэйэр кутум — ийэ тылым», «Мин дойдум — мин киэн туттуум», «Тыйаатыр — өйү-санааны кэңэтэр, дириңэтэр алыптаах кэрэ эйгэ», «Сомоҕолоһуу- норуоту түмэр күүс» диэн тиэмэлэргэ хоһооннорун аахтылар.

Дьүүллүүр сүбэ чилиэннэрэ улуустааҕы киин библиотека дириэктэрэ Елизавета Корнилова, «Майа сэлиэнньэтэ» МТ баһылыгын солбуйааччыта Гаврил Толстяков уонна улуустааҕы ыччат уонна дьиэ кэргэн салалтатын начальнига Ирина Назарова хас биирдии кыттааччыны болҕомтолоохтук истэн түмүктэри таһаардылар.

Эдэр ыччат ортотугар Алтан нэһилиэгиттэн Сергей Смолин кылаан бирииһи ылан сертификатынан наҕараадаланна. Маныаха  «Ылбаҕай тыл ымыыта» анал ааты Тыыллыма орто оскуолатын 11 кылааһын үөрэнээччитэ Сайаана Чичихова, «Кэскиллээх хоһоонньут» анал ааты Тыыллыма орто оскуолатын 10 кылааһын үөрэнээччитэ Николай Шишигин, «Иэйиилээх хоһоонньут» Ороссолуодаттан Иван Афанасьев,  «Кэрэ тыл кэрэһитэ» Хорообуттан Александра Пинигина,  «Хомоҕой хоһоонньут» аатын Майаттан Майя Ильина ылла. Итиэннэ хоһоон ааҕыытын куонкуруһугар кыттыыны ылбыттарга дьүүллүүр сүбэ туоһу суруктары  туттартаата.

Төрөөбүт тыл, сурук-бичик күнүгэр аналлаах тэрээһиннэр нэдиэлэ устата ыытыллыахтара. Олунньу 14 күнүгэр «Илгэлээх ийэ тылым, төлкөлөөх төрүт тылым» диэн ааттаммыт сахалыы тылынан  тотальнай диктант суруйуута, олунньу 15   күнүгэр үһүс көлүөнэ оскуолатын, итиэннэ улуустааҕы көрбөттөр обществоларын кытта холбоһуктаах «Т.О.К.» оонньуу ыытыллыаҕа.

Марина Трифонова.