Саха АССР народнай артыыһа Ефремов Афанасий Егорович 100 сылыгар аналлаах декада

2-с Наахара нэһилиэгэр ахсынньы ый 4 — 14 күннэригэр биир дойдулаахпыт, Саха АССР народнай артыыһа Ефремов Афанасий Егорович 100 сылыгар аналлаах декада ыытылынна. Декада чэрчитинэн «Талааным-кэнчээри ыччаппар» диэн оскуола оҕолоругар уонна ыччаттарга улуустааҕы уус-уран ааҕыы күрэҕэ, «Алаас ахтылҕана» фотоконкурс, хары баттаһыытыгар күрэхтэр буоллулар. Д.Ходулов аатынан Майатааҕы народнай театр «Ытыллыбыт ох төннүбэт» , народнай артыыс Ефремов А.Е. аатынан сынньалаҥ киин иһинэн үлэлиир драм коллектив (сал. Никанорова Н.Д.) С.Ефремов «Куорат кыыһа» драмаларын көрдөрдүлэр. Оскуола оҕолоругар кылаас чаастара ыытылыннылар, «Норуоттан тахсыбыт талаан» диэн ааттаах обзордаах кинигэ быыстапката тэрилиннэ. Ахсынньы 14 күнүгэр «Киһи кэрэмэһэ, артыыс ааттааҕа» диэн ааттаах декаданы түмүктүүр үөрүүлээх тэрээһин буолла. Биир дойдулаахпыт народнай артыыс Ефремов А.Е. олоҕун, айар үлэтин сырдатар дьоҕус музей-хос үөрүүлээх аһыллыыта буолла. «2-с Наахара нэһилиэгэ» МТ аҕа баһылыга Никитин П.П. музей-хос арыллыытынан эҕэрдэлээн тыл эттэ. Бу музей-хос арыллыыта бастатан туран сүдү киһибитигэр сүгүрүйүү буоларын, кини аатын үйэтитии буоларын тоһоҕолоон бэлиэтээтэ. РФ үтүөлээх, СР народнай артыыһа, ССРС Государственнай бириэмийэтин лауреата Герасим Семенович Васильев истиҥ-иһирэх ахтыы оҥордо, Ефремов А.Е. кыра кыыһа Надежда Афанасьевна аҕаларын аатын үйэтитэн дойдутугар музей-хос арыллыбытынан олохтоохторго махталын биллэрдэ уонна аҕаларын 100 сылынан хомуйан, түмэн таһаарбыт «Санаа баҕатынан» диэн диискэлээх альбом-кинигэни нэһилиэк, оскуола библиотекаларыгар, аймахтарыгар, аҕаларын кытта алтыспыт дьон оҕолоругар бэлэхтээтэ. Музей-хос үөрүүлээх аһыллыытын лиэнтэтин быстылар нэһилиэк аҕа баһылыга Никитин П.П., народнай артыыс бииргэ төрөөбүт быраата Ефремов Н.Е. уонна улахан кыыһа Бурцева В Г. Музей-хос матырыйаалларын, докумуоннарын наардаабыт, сааһылаабыт Васильева А.Х. кэлбит дьоҥҥо сиһилии билсиһиннэрдэ. Салгыы Ефремов А.Е. оҕолоро, бииргэ төрөөбүт быраата Ефремов Н.Е., аймахтара ахтыы оҥордулар, сэмэй бэлэхтэрин туттардылар. Улуустааҕы культура управлениетын специалиһа Кириллина С.П., ыччат уонна дьиэ кэргэн управлениетын бспециалиһа Назарова И.Е., улуустааҕы кыраайы үөрэтэр музей директора Шарина З.В. эҕэрдэ тылларын эттилэр, махтал суруктары туттардылар. А.Е.Ефремов оҕолоро аҕаларын аатын сүгэр сынньалаҥ киинигэр баян бэлэхтээтилэр. Музей- хос үөрүүлээх арыллыытын нэһилиэк библиотекара Никанорова И.Д. ыытта.Декада чэрчитинэн ыытыллыбыт күрэхтэр кыайыылаахтарын чиэстээтилэр. Үөрүүлээх тэрээһини РФ уонна СР үтүөлээх артыыһа, СР народнай артыыһа Колесова-Расторгуева М.П.аатынан музыка кылааһын иитиллээччилэрэ «Дьэргэлгэн» вокальнай ансамбль ырыанан киэргэттэ, сал СР үөрэҕириитин туйгуна Никаноров Н.И.
П.А.Ойуунускай аатынан саха театрын эдэр көлүөнэ артыыстара Алампа «Олох дьэбэрэтэ» драматын көрдөрдүлэр. Олохтоохтор дохсун ытыс тыаһынан көрүстүлэр.