Саҥа култуура киинин дьиэтэ — Тиэлигигэ

Ахсынньы 20 күнүгэр I Наахара нэһилиэгэр РФ уонна СӨ норуодунай артыыската, Былатыан Ойуунускай аатынан Судаарыстыбаннай бириэмийэ лауреата, Мэҥэ-Хаҥалас улууһун уонна I Наахара нэһилиэгин Бочуоттаах олохтооҕо Степанида Ильинична Борисова аатынан Норуот айымньытын дьиэтин култуура киинин үөрүүлээх аһыллыыта буолла. Саҥа тутуу күлүүһүн «СахаСтройТехнология» ХЭТ салайааччыта Виктор Борисов дириэктэргэ Давид Трофимовка туттарда.

 

Үөрүүлээх тэрээһиҥҥэ СӨ Ил Дарханын уонна Бырабыытылыстыбатын дьаһалтатын салайааччыта Афанасий Владимиров,  Ил Түмэн бюджеккэ, үпкэ, нолуокка уонна сыана политикатыгар, бас билиигэ уонна приватизацияҕа сис кэмитиэтин бэрэссэдээтэлэ Юрий Николаев, Амма, Чурапчы, Таатта, Сунтаар улуустарыттан делегациялар ыалдьыттаатылар. Сахалыы сиэринэн аал уот иччитин арыылаах алаадьынан, уохтаах кымыһынан күндүлээн дьиэ үйэлээх буоларыгар баҕаран алгысчыт алгыс тылын анаата. Ол кэннэ саҥа тутууга Степанида Борисова аатын иҥэрэр туһунан дьаһалы нэһилиэк бибилэтиэкэрэ Сардаана Сергеева ааҕан иһитиннэрдэ уонна  Степанида Ильиничнаҕа анаммыт истиэндэни үөрүүлээх быһыыга-майгыга астылар.

«Мин Сахам сирэ XXI үйэҕэ» Өрөспүбүлүкэтээҕи үтүө дьыала хамсааһын тэриллибитэ 20 сылын бэлиэтиир тэрээһиҥҥэ эҕэрдэ тыллар этилиннилэр, наҕараадалар туттарылыннылар. I Наахара нэһилиэгин бибилэтиэкэригэр өр сыллаах, таһаарыылаах үлэтин иһин Сардаана Николаевна Сергееваҕа «Саха Өрөспүүбүлүкэтин култууратын туйгуна» анал бэлиэ туттарылынна. Бэлиэтээн эттэххэ, И.Г.Спиридонов уола аҕатын дьиэтээҕи бибилэтиэкэтиттэн научнай кинигэлэрин (400 экземпляр) кинигэни бэлэх биэрэрин туһунан Россия академиятын Сибиирдээҕи отделениетын Саха сиринээҕи филиалын научнай киинин бэрэссэдээтэлин солбуйаччыта Александр Пахомов иһитиннэрдэ. Итиэннэ Александр Пахомов бэйэтин дьиэтээҕи бибилэтиэкэтиттэн 100 экземпляр кинигэни нэһилиэк бибилэтиэкэтигэр бэлэх уунарын туһунан эттэ.

Онон олохтоохтор өр сылларга кэтэспит ыра санаалара туолан саҥа тутууга үгүс бэлиэ тэрээһиннэр ыытыллыахтара диэн эрэнэбит. Норуот айымньытын дьиэтин үлэтэ таһаарыылаах, айымньылаах буоларыгар, итиэннэ нэһилиэк бибилэтиэкэтигэр элбэх ааҕааччы сылдьарыгар, үлэ күөстүү оргуйарыгар баҕарабыт.