«Поэзия хонуутугар»

Аан дойдутааҕы поэзия күнүн көрсө И.М.Сосин аатынан Майатааҕы киин библиотекаҕа үһүс көлүөнэ оскуолатын литературнай куруһуогун  чилиэннэрэ (салайааччы Валентина Аманатова) Дьокуускай куораттан «Литературная гостиная» куруһуок кыттыылаахтарын кытта (салайааччы Мария Степанова) «Поэзия хонуутугар» диэн ааттаммыт тэрээһиҥҥэ көрүстүлэр.

Бэлиэтээн эттэххэ, үһүс көлүөнэ оскуолатын литературнай куруһуогун чилиэннэрэ айар үлэ абылаҥар ылларан, поэзияҕа умсугутуулаахтык  киирэн бэйэлэрин холонууларын суруйаллар. Ити курдук, тэрээһин кыттыылаахтара төрөөбүт дойдуларыгар, норуоттарыгар тапталларын уратытык хоһуйар  туспа суоллаахтарын-иистээхтэрин «Поэзия хонуутугар» билиһиннэрдилэр. Хас биирдиилэрэ айылҕаттан айдарыылаах талба талааннаахтарын бу күн көрдөрдүлэр.  Үһүс көлүөнэ оскуолатын чилиэннэрэ айар үлэ абылаҥыттан ураты иистэнэллэрин, баайалларын бэйэ-бэйэлэригэр көрдөрөн уопут атастаһан тарҕастылар. Дьокуускай куораттааҕы «Литературная гостиная»  куруһуок салайааччыта Мария Степанова театр сылынан бириистээх викторина ыытан тэрээһин кыттыылаахтарын сэргэхситтэ. Тэрээһин түмүгэр, Дьокуускай куораттааҕы «Литературная гостиная» куруьуок чилиэннэрэ улуустааҕы киин библиотекаҕа бэйэлэрэ таһаарбыт кинигэлэрин бэлэх ууннулар.