«Ньургуһун күнэ — Догдоҥоҕо»

Ыам ыйын 21 күнүгэр Мэҥэ-Хаҥаластааҕы инбэлииттэр обществоларын көҕүлээһининэн «Ньургуһун күнэ» диэн ааттаммыт тэрээһин Догдоҥо нэһилиэгин балаҕаныгар ыытылынна. Тэрээһиҥҥэ улууспут нэһилиэктэриттэн инбэлииттэр обществоларын чилиэннэрэ көхтөөх кыттыыны ыллылар.

         Ньургуһун күнүн Догдоҥо нэһилиэгин культуратын киинин салайааччыта Светлана Гоголева иилээн ыытта. Ити курдук, Светлана Георгиевна арыылаах алаадьынан аал уоту күндүлээн уһун унньуктаах кыһын кэнниттэн күөххэ үктэммиппитинэн алгыс тылын эттэ. Майаттан улуустааҕы  көрбөттөр обществоларын чилиэнэ Николай Потапов кэлбит ыалдьыттары гитаралаах ырыанан эҕэрдэлээтэ. Бу күн улууспут нэһилиэктэриттэн барыта 40-тан тахса инбэлиит кыттыыны ылан ньургуһун туһунан ырыа куонкуруһугар, итиэннэ араас матырыйаалтан ньургуһун сибэккини оҥорууга күрэхтэстилэр. Ырыа куонкуруһугар биирдиилээн кыттааччылары таһынан, Догдоҥо нэһилиэгиттэн трио уонна Мэҥэ нэһилиэгиттэн «Балыктаах кыргыттара» квартет ньургуһун туһунан ырыалартан попурри ыллаан иһитиннэрдилэр. Хас биирдии кыттааччы эрдэттэн бэлэмнэнэн кэлбиттэрин бэлиэтиир тоҕоостоох.

Онтон ньургуһун сибэккини араас матырыйаалтан оҥоруу куонкуруһугар барыта 11 кыттааччы кытынна. Майаттан Марфа Алексеева фоамиран матырыйаалтан ньургуһун сибэкки арааһын оҥорон аҕалбытын дьон көрүүтүгэр туруорда. Онтон Бэдьимэттэн Варвара Сергучева бисквит туордун ньургуһун сибэккинэн киэргэтэн аҕалбытын амсатта. Бу куонкуруска аҥардас дьахтар аймах эрэ буолбакка, эр дьон эмиэ көхтөөх кыттыыны ыллылар. Ити курдук, Павловскайтан Юрий Марков уонна Майаттан Анатолий Афанасьев сибэкки оҥоһуктарын оҥорон аҕалбыттарын көрдөрдүлэр, дьүүллүүр сүбэ иннигэр кэпсээтилэр.

Бу күн ыытыллыбыт икки куонкурус түмүгүнэн кыайыылаахтар ааттаннылар, итиэннэ улуустааҕы киин библиотека ыыппыт литературнай викторинатыгар көхтөөх кыттыыны ылбыт инбэлииттэр обществоларын чилиэннэригэр Майаттан Татьяна Афанасьеваҕа, Раиса Кардашевскаяҕа, Марфа Алексееваҕа, Балыктаахтан Марфа Ноговицынаҕа сэмэй бэлэхтэр туттарылыннылар. Сайыҥҥылыы күн-дьыл туран биэрэн, нэһилиэктэртэн кэлбит ыалдьыттар бары оонньууларга көхтөөхтүк кытыннылар.