«Мэҥэ Хаҥалас улууһун историятыттан» диэн ааттаммыт саҥа кинигэ сүрэхтэннэ

 

Олунньу 10 күнэ — Мэҥэ Хаҥалас улууһа төрүттэммит күнэ. Бу бэлиэ күҥҥэ улуус уруккутун, араас кэмҥэ сайдан кэлбит кэрчик кэмнэрин, история чахчыларын сырдатар «Мэҥэ Хаҥалас улууһун историятыттан» диэн ааттаммыт саҥа кинигэ сүрэхтэннэ. Научнай – популярнай хайысхалаах кинигэни улуус историятын үөрэтиигэ олоҕун анаабыт ытык сүбэһиппит, тыыл, педагогическай үлэ ветерана, ССРС, РСФСР үөрэҕириитин туйгуна, Учууталлар учууталлара, Мэҥэ Хаҥалас улууһун Бочуоттаах олохтооҕо, историк – кыраайы үөрэтээччи Михаил Егорович Капитонов түмэн, хомуйан оҥордо. Историческай наука кандидата, доцент, Мэҥэ Хаҥалас оройуонун Бочуоттаах олохтооҕо Егор Спиридонович Шишигин кинигэ сыанабылын суруйбут. Улууспут түҥ былыргыттан хайдах сайдан испитэ, сахалар материальнай, духуобунай культурабыт, аатырбыт, киэн туттар биир дойдулаахтарбыт, нэһилиэктэрбит, холкуостар, сопхуостар, тэрилтэлэрбит тустарынан архыып докумуоннарыгар олоҕуран сиһилии суруллубутун Егор Спиридонович бэлиэтээбит.

Кинигэ икки тылынан суруллубут, Дьокуускайга «Кытыл» кинигэ кыһатыгар бэчээттэнэн таҕыста.

Үөрүүлээх тэрээһиҥҥэ «Мэҥэ Хаҥалас улууһа» МО баһылыгын солбуйааччыта Николай Гаврильевич Цыпандин, Ил Түмэн Государственнай мунньаҕын депутата Андрей Михайлович Находкин, СӨ кырдьаҕастарын Ытык Сүбэтин бэрэссэдээтэлэ Люлия Николаевна Григорьева, Саха АССР норуотун хаһаайыстыбатын үтүөлээх үлэһитэ Георгий Михайлович Артемьев, «Нөөрүктээйи нэһилиэгэ» МТ баһылыга Николай Гаврильевич Федоров, уо.д.а. авторга Михаил Егоровичка махтал тылларын эттилэр, саҥа кинигэ тахсыбытынан эҕэрдэлэрин тиэртилэр.

Михаил Егорович Капитонов кинигэ тахсыытыгар үлэлэспиттэргэ махтанан туран, салгыы кинигэ иккис чааһа суруллуон наадатын туһунан эттэ.