Майаҕа олоҥхо дьыктаанын суруйдулар

И.М.Сосин аатынан улуустааҕы киин библиотекаҕа «Уруйдан Улуу Олоҥхо, Манчаары дойдутугар» диэн ааттаммыт олоҥхо дьыктаанын суруйуу ыытылынна. Өрөспүүбүлүкэбит бары улуустарыгар ыытыллар аахсыйаны өйөөн, 20-тэн тахса Майабыт олоҥхону сэҥээрээччилэрэ кэлэн көхтөөх кыттыыны ыллылар. Олоҥхо дьиэтин салайааччыта Евдокия Иванова тэрээһин саҕаланыытыгар олоҥхо декадатын чэрчитинэн туох-ханнык тэрээһиннэр ыытыллалларын сырдатан кэпсээтэ.

Ити курдук, бу күн Ф.Г.Охлопков аатынан Майа орто оскуолатын саха тылыгар уонна литературатыгар учуутала Наталья Пахомова дьыктааны суруйтарда. Прокопий Ядрихинскай — Бэдьээлэ «Дьырыбына Дьырылыатта Кыыс Бухатыыр» олоҥхотуттан  быһа тардыы тиэкиһэ бэрилиннэ. Түмүккэ, аахсыйаҕа кыттыыны ылбыт Майа олохтоохторугар Туоһу суруктар туттарылыннылар.