«Киһи дьоло үс төрүттээх», «Суон сурахтаах Суола үрэх» III чааһа кинигэлэр сүрэхтэннилэр

Ахсынньы 12 күнүгэр И.М.Сосин аатынан улуустааҕы киин библиотекаҕа Суола үрэх чуор тойуксута, ырыа куттаах лирик — поэт, сээркээн сэһэнньит Иннокентий Михайлович Сосин «Киһи дьоло үс төрүттээх», «Суон сурахтаах Суола үрэх» (III чааһа) икки кинигэ сүрэхтэниитэ буолан ааста. Иннокентий Михайлович биһиги кэккэбитигэр билигин төһө да суох буоллар, кини айар үлэтин төрөппүт оҕолоро, үөрэппит, уһуйбут үөрэнээччилэрэ салҕыыллар. «Киһи дьоло үс төрүттээх» кинигэни  кыргыттара Дария Иннокентьевна Захарова уонна Октябрина Иннокентьевна Сосина түмэн, хомуйан оҥордулар. Мария Дмитриевна Ноговицына редактордаата.

Кинигэ сүрэхтэниитигэр улуустааҕы депутаттар Сэбиэттэрин бэрэссэдээтэлэ Павел Данилович Сазонов, саха норуодунай суруйааччыта Семен Андреевич Попов — Сэмэн Тумат, Мэҥэ-Хаҥалас улууһун Бочуоттаах олохтооҕо Афанасий Васильевич Чугунов, поэт, прозаик, суруналыыс Иван Иванович Осипов — Уйбаан Ойуур, Россия суруйааччыларын сойууһун чилиэнэ Константин Ильич Сосин, энтузиаст дьонтон биирдэстэрэ, Саха Өрөспүүбүлүкэтин үтүөлээх үлэһитэ Саргылана Саввична Адамова — Алтан Кыыс, «Кыталык» норуодунай үҥкүү ансаамбылын уус-уран салайааччыта Василий Павлович Винокуров, улуустааҕы дьиэ кэргэн уонна ыччат политикатыгар управлениетын салайааччыта Ирина Егоровна Назарова, М.К.Попова аатынан оҕо искусствотын оскуолатын художественнай кылааһын уһуйааччыта Анастасия Михайловна Константинова, улуустааҕы «Ытык Сүбэ» кырдьаҕастар сэбиэттэрин бэрэссэдээтэлэ Василий Алексеевич Эверстов, кыраайы үөрэтээччи Апполлон Михайлович Апросимов уо.д.а. бэйэлэрин эҕэрдэлэрин тириэртилэр, И.М.Сосины кытта алтыспыт кэмнэриттэн ахтан-санаан аастылар.

Түмүккэ, И.М.Сосин улахан кыыһа Дария Захарова кинигэ тахсыытыгар үлэлэспит дьонугар-сэргэтигэр махталын биллэрдэ, итиэннэ суруйааччы төрөөбүт нэһилиэгэр олорбут дьиэтигэр музей тэрийэр туһунан этии киллэрдэ. Маныаха Морук нэһилиэгин оскуолатын салалтатыгар И.М.Сосин аатын үйэтитэн, үгэскэ кубулуйбут ааҕыылары тэрийэн ыытарга санаатын эттэ.