«Илгэлээх ийэ тылым, төлкөлөөх төрүт тылым»

Олунньу 14 күнүгэр И.М.Сосин аатынан  улуустааҕы киин библиотека көҕүлээһининэн «Илгэлээх ийэ тылым, төлкөлөөх төрүт тылым» диэн ааттаммыт сахалыы тылынан диктант суруйуута ыытылынна.

Бэйэлэрин билиилэрин, сахалыы төһө сөптөөхтүк суруйалларын улууспут 31 олохтооҕо, Майа сэлиэнньэтин араас тэрилтэлэриттэн кэлэн бэрэбиэркэлэнэн сахалыы диктаны суруйдулар. Диктаны Майатааҕы лицей саха тылыгар уонна литературатыгар учуутала Т.Е.Слободчикова доргуччу ааҕан иһитиннэрдэ. Бэлиэтээн эттэххэ, «Өбүгэ үөрэҕэ» диэн тиэкси анал диктант хомуурунньугуттан суруйтарда.

Бу күн төрөөбүт тыл күнүгэр анаммыт «Илгэлээх ийэ тылым, төлкөлөөх төрүт тылым» диэн ааттаммыт кинигэ быыстапкатын тэрээһин кыттыылаахтара сэргээн көрдүлэр. Быыстапкаҕа саха тылын тылдьыттара, саха бастакы лингвист учуонайа С.А.Новгородов улэлэрин кинигэлэрэ дьон көрүүтүгэр турдулар.