Эр дьон алгыһа түстэннэ

Тохсунньу 27 күнүгэр 2-с Наахара нэһилиэгэр эр дьону түмэр, эр дьоҥҥо сахалыы тыыны уһугуннарар, эр дьону сомоҕолуур сыаллаах эр дьон алгыһа түстэннэ. Тэрээһиҥҥэ Нам улууһуттан уонна Дьокуускай куоракка олорор, үлэлиир Наахараттан төрүттээх биир дойдулаахтарбыт эр дьоннор кэлэн ыалдьыттаатылар. Тэрээһини нэһилиэкпит ытык кырдьаҕаһа Иван Павлович Никаноров алгыһынан аста. «Чэбдик» кулууп далбар хотуттара кыынньар биэ кымыһынан, арыылаах алаадьынан, үөрүү саламаатынан күндүлээтилэр.
Тэрээһиммит ытыктабыллаах ыалдьыттарынан норуот эмчитэ Егорова А.П.- Тупсууна, «Сүр көтөҕүү» бырайыак ааптара Винокуров В.П., улуустааҕы культура уонна духуобунай сайдыы управлениетын начальнига Аргунов Д.И., «Тумарык» бааһынай хаһаайыстыба салайааччыта Васильев П.П. буоллулар. Кулууп дьиэҕэ мустубут уолаттарга, эр дьоҥҥо эр дьон оһуокайын Дархан этээччи Станислав Иванов түһүлгэ олохтоон сомоҕолоото.
Бу күн эр дьон оруолун үрдэтэр суолталаахь сэргэх этиилэр этилиннилэр. Эр киһи — аҕа, тойон, баһылык! диэн кинигэ быыстапката тэрилиннэ.