«Библионочь — 2019»

Муус устар 25 күнүгэр Майатааҕы Дмитрий Ходулов аатынан норуот айымньытын дьиэтигэр И.М.Сосин аатынан улуустааҕы киин  библиотека уонна М.И.Брызгалова аатынан оҕо библиотекатын тэрийиитинэн Бүтүн Россиятааҕы акцияҕа кыттыһан  «Библионочь — 2019» тэрээһин киэҥ далааһыннаахтык ыытылынна.

«Библионочь — 2019» тэрээһин Россияҕа биллэриллибит театр сылыгар ананан ыытылынна. Буойун – суруйааччы Тимофей Сметанин «Атын киһи оҕото» айымньытынан Майатааҕы киин библиотека, эбии үөрэхтээһин үөрэтэр-оҥорон таһаарар киин уонна баьаарынай чаас үлэһиттэрин толорууларыгар испэктээгинэн саҕаланна. Бэлиэтээн эттэххэ, 63-с төгүлүн ыытыллар культура уонна спорт эстафетатыгар «Атын киһи оҕото» испэктээк үһүс миэстэни ылбыта, итиэннэ «Бастыҥ сценография» анал аатынан бэлиэтэммитэ.

Быйыл алтыс төгүлүн Бүтүн Россия үрдүнэн биллэриллибит акцияҕа кыттыһан нэһилиэнньэҕэ анаан киин библиотека тотальнай диктант суруйуутун ыытар. Сыл ахсын бэйэтин билиитин тургутан көрүөн баҕалаах ааҕааччы ахсаана элбии турара тэрийээччилэри үөрдэр. «Библионочь — 2019» үөрүүлээх чааһыгар сахалыы уонна нууччалыы диктаннары туйгун сыанаҕа суруйбут ааҕааччылар бэлиэтэннилэр. Улуустааҕы киин библиотека дириэктэрэ Елизавета Семеновна Корнилова  Ийэ тыл уонна сурук – бичик күнүгэр аналлаах декада чэрчитинэн ыытыллыбыт сахалыы диктант суруйуутун кыайыылаахтарыгар Сардана Аввакумоваҕа, Наталья Андрееваҕа, Марелла Баишеваҕа, Саргылана Гороховаҕа, Мария Зыковаҕа, Сергей Ивановка, Аркадий Иннокентьевка, Алевтина Климентоваҕа, Николай Лукиҥҥа, Марианна Скрябинаҕа, Карл Терентьевка, Калисфена Федороваҕа, онтон нууччалыы тылынан диктант кыайыылаахтарыгар Февронья Егороваҕа, Евгения Григорьеваҕа, Анна Васильеваҕа, Майя Ильинаҕа биһирэбил суруктары туттартаата.

Улуустааҕы киин библиотека уонна оҕо библиотекатын аатыттан куруук күүс-көмө буолар, бииргэ үлэлэһэр социальнай партнердарга истиҥ тыллаах махтал суруктар туттарылыннылар.

Маныаха «Мин Ийэ тылым – саха тыла» диэн ааттаммыт эссе суруйуутугар куонкурс түмүгүнэн кыайыылаахтар ааттаннылар. Биһирэбил суруктары Наахара орто оскуолатын 5-с кылааһын үөрэнээччитэ Мотя Назарова, Майатааҕы үһүс көлүөнэ оскуолатын «Саһарҕа» литературнай куруһуогун салайааччыта  Валентина Аманатова ыллылар. Светлана Иванова – Намыына, Елена Атласова, Зоя Герасимова туоһу суруктары туттулар.

Библиотекаҕа куруутун сылдьар, кинигэни умсугуйан туран, себүлээн ааҕар дьон утуе холобур буолаллар. Бу күн бастыҥ ааҕааччыларга анал ааттар туттарылыннылар.  Ол курдук сэдэхтик көстөр сыаналаах кинигэлэри киин библиотекаҕа бэлэх ууммут Нюргуяна Саввинова «Сыаналаммат ураты бэлэх» анал ааты тутта, онтон «Бастыҥ ааҕар дьиэ кэргэн» анал ааты Ирина, Иван Бурнашевтар сүктүлэр, «Бастыҥ ааҕааччы» анал ааты Ольга Анисимова ылла уонна Майатааҕы лицей үөрэнээччитэ Альберт Соловьев «Ааҕар саала бастыҥ лиидэрэ» анал аатынан бэлиэтэннэ.

Театр сылыгар анаан викторина ыйытыктарыгар ааҕааччылар бэйэлэрин билиилэрин холонон боппуруостарга эппиэттээтилэр, тэрээһинтэн астынан тарҕастылар.  Кинигэ киһи аймах сайдыытыгар сүдү оруолун бары өйдүүбүт. Төһө да үйэ уларыйбытын, олохпут тэтимнээхтик сайдыбыт иһин кинигэ суолтата, хаһан даҕаны сүппэт, сырдыкка, кэрэҕэ, үтүөҕэ угуйар суолтата намтаабат.

Салгыы бу күн Бүтүн Россиятааҕы «Библионочь — 2019» тэрээһин чэрчитинэн Майа сэлиэнньэтин тэрилтэлэрин икки ардыларыгар интеллектуальнай Квиз оонньуу ыытылынна. Барыта аҕыс хамаанда: В.П.Ларионов аатынан Майатааҕы орто оскуола, Ф.Г.Охлопков аатынан Майатааҕы орто оскуола икки хамаандата, улуустааҕы киин балыыьа, сбербаан, Майа сэлиэнньэтин дьаһалтатын хамаандата, «Тандем», «Манчаары» хамаандалар күөн көрсөн өркөн өйдөөхтөрү быһаарыстылар. Ооонньууну Феликс Спартакович Титов салайан ыытта. Тыҥааһыннаах киирсии түмүгүнэн Майа сэлиэнньэтин дьаһалтатын хамаандата кыайыылааҕынан тахсан, харчынан бириэмийэлэннилэр.