«Артыыс, эн үрдүк ааккар сүгүрүйэн!»

И.М.Сосин аатынан улуустааҕы киин библиотека5а үгүс көрөөччү кутун туппут, дьон биһирэбилин ылбыт СӨ үтүөлээх артыыһа, П.А.Ойуунускай аатынан Саха Академическай тыйаатырын артыыската Елизавета Потапова ыалдьыттаата. Бэлиэтээн эттэххэ, Россияҕа тыйаатыр сыла биллэриллибитинэн улуустааҕы киин библиотека үлэһиттэрэ ааҕааччыларга анаан тыйаатыр артыыстарын кытта араас хайысхалаах үгүс тэрээһиннэри, интэриэһинэй көрсүһүүлэри ыытарга былаанныыбыт.

«Артыыс, эн үрдүк ааккар сүгүрүйэн!» диэн ааттаммыт көрсүһүү биир дойдулаахпыт, поэт, суруйааччы Иннокентий Сосин хоһооннорунан «Төрөөбүт алаас ахтылҕана» диэн композициянан саҕаланна. Елизавета Федотовна Майа сэлиэнньэтин олохтоохторун кытта бэрт сэргэхтик көрсөн, кимтэн кииннээҕин, хантан хааннааҕын билиһиннэрэн кэпсээнин саҕалаата.

СӨ үтүөлээх артыыската Елизавета Потапова М.С.Щепкин аатынан Үрдүкү театральнай училищены бүтэрээт, Ньурба государственнай көһө сылдьар драматическай тыйаатырыгар, онтон 1997 сыллаахтан Саха Академическай тыйаатырыгар үлэлиир. Ч.Айтматов «Ийэ сирэ» – Толгонай, Т.Сметанин «Лоокуут уонна Ньургуһун» – Ньургуһун, Р.Том «Аҕыс дьахтар амарах таптала» – Кэти, о.д.а. оруолларыгар оонньообутун, киинэлэргэ уһуллубутун кэпсээтэ. Маныаха Елизавета Федотовна «Саха» национальнай көрдөрөр — иһитиннэрэр хампаанньа «Кэл, олор, сэһэргэһиэх» биэриитин ыытааччытын быһыытынан хайдах үлэтин саҕалаабытын сиһилии сэһэргээтэ.

Елизавета Федотовна Майа сэлиэнньэтин олохтоохторугар анаан Сардаана Амгинская уонна Сайа хоһооннорун иэйиилээхтик ааҕан иһитиннэрдэ. Тэрээһин кыттыылаахтара Елизавета Потаповаттан интэриэһиргиир боппуруостарын туоһуластылар. Ити курдук, Майа сэлиэнньэтин олохтооҕо, оройуон депутата Зиновий Игнатьев, улуустааҕы кыраайы үөрэтэр музей дириэктэрэ Зоя Шарина, «Таммахтар» литературнай түмсүү салайааччыта Августина Хабарова, Майатааҕы үһүс көлүөнэ оскуолатын «Саһарҕа» литературнай куруһуогун салайааччыта Валентина Аманатова, улуустааҕы ветераннар сэбиэттэрин бэрэссэдээтэлэ Маргарита Максимова эҕэрдэ тылларын, баҕа санааларын эттилэр. Аймахтара Матрена Игнатьева, Матрена Матчитова, Варвара Сидорова Елизавета Потапова а5атын, РФ үтүөлээх артыыһа, режиссер Федот Потапов туһунан олус истиҥник ахтан – санаан аастылар. Истиҥ, аһаҕас көрсүһүүттэн ааҕааччылар астынан тарҕастылар.