«Үлэ киһитинэн киэн туттабыт»

Олунньу 18 күнүгэр И.М.Сосин аатынан Мэңэ Хаңаластаа5ы киин библиотекаҕа Үлэ Албан Аата уордьан толору кавалера, Мэңэ Хаңалас улууһун Бочуоттаах гражданина Андрей Дмитриевич Дмитриев төрөөбүтэ 75 сылыгар аналлаах «Үлэ киһитинэн киэн туттабыт» диэн ааттаммыт үтүө тэрээһин ыытылынна. Тэрээһини улуустааҕы киин библиотека үлэһитэ Екатерина Константиновна Попова салайан ыытта.

Бу бэлиэ тэрээһиңңэ Андрей Дмитриевич Дмитриев кэргэнэ, Саха Өрөспүүбүлүкэтин үөрэҕириитин туйгуна, Россия үөрэҕириитин  Бочуоттаах үлэһитэ С.Г.Дмитриева, «Майа сэлиэнньэтэ» МТ баһылыга Д.И.Тихонов, Мэңэ Хаңалас улууһун Ытык сүбэтэн бэрэссэдээтэлэ В.А.Эверстов, Андрей Дмитриев доҕотторо, кинини кытта бииргэ үлэлээбит үөлээннээхтэрэ В.Т.Окороков, М.Н.Атласов, З.И.Игнатьев, Ф.А.Алексеев, уо. д.а. кыттыыны ылан, А.Д.Дмитриев туһунан истиң — иһирэх тылынан ахтан — санаан аастылар.


Ол курдук, Майа сэлиэнньэтин баһылыга Дмитрий Иванович «Геройдар аллеялара» диэн ааттаммыт сквер оңоруутугар бырайыак оңоһулла сылдьарын, итиэннэ Майаҕа Маамыкаан түөлбэҕэ биир саҥа уулусса кини аатын сүгэрин, Василий Титович Окороков А.Д.Дмитриев кэлэктиип сынньалаңын сөптөөхтүк тэрийэрин, онтон Михаил Николаевич Атласов оройуоннааҕы «Сельхозтехника» кэлэктиипэ Культура уонна спорт эстафетатыгар түүннэри — күнүстэри үлэлээн уоттаах-күөстээх декорациялары оңороллорун, кэнсиэртиир саал куруук толору буоларын, Зиновий Иванович Игнатьев «Сельхозтехника» үлэһиттэрэ бириэмэни тутуһан, тэтимнээхтик үлэлииллэрин ахтан аастылар, үтүө киһини Андрей Дмитриевы кытта бииргэ үлэлээбиппитинэн киэн туттабыт, диэн хас биирдиилэрэ эттилэр.


Бу күн Софья Гаврильевна кэлбит ыалдьыттарга тапталлаах кэргэнин Уордьаннарын, ылбыт наҕараадаларын көрдөрдө.

Бэлиэтээн эттэххэ, Ходоро, Хара, Нөөрүктээйи, Ороссолуода нэһилиэктэригэр, оскуолаларга, Аллараа Бэстээхтээҕи транспортнай техникумҥа, Майа сэлиэнньэтин оскуолаларыгар, Майатааҕы дьиэ кэргэн киинигэр Кинигэ уонна Ааҕааччы форматынан араас көрүҥнээх тэрээһиннэр ыытылыннылар. Тэрээһиннэргэ барыта 1426 ааҕааччы кыттыыны ылбыт. Р.Г.Васильев аатынан кыраайы үөрэтэр музей көһөрүллэ сылдьар экспозициятын 332 киһи көрбүт. Онтон М.И.Брызгалова аатынан оҕо библиотеката МЕДИАУРОК бырайыага 600 ааҕааччыны хабан ыытыллыбыт.

Үлэ-дьол. Үлэ киһини киэргэтэр, бар дьон туһугар, кимиэхэ эрэ үтүөнү оңордорбун диэн санаанан ис сүрэхтэн салайтаран үлэлээбит, ону олоҕун сүрүн сыала-соруга оңостубут киһинэн буолар АНДРЕЙ ДМИТРИЕВИЧ ДМИТРИЕВ. Кини мындыр өйүн, киэҥ — холку майгытын, үлэни өрө тутан, дьону түмэр дьоҕурун киһи сөҕөр, махтайар уонна холобур оҥостор.