Главная страница

Улууска олунньу 9 күнүгэр, биир бириэмэҕэ, киэһээ 16 чаастан Ийэ тыл уонна сурук-бичик күнүн көрсө улуустааҕы киин библиотека тэрээһининэн сахалыы тылынан диктант суруйуута ыытылынна.
Майаҕа, киин библиотекаҕа 40 киһи кэлэн кыттыыны ылла. Нэһилиэк библиотекаларынан 528 ааҕааччы бэйэтин тургутан көрдө. Уопсайа улуус үрдүнэн 568 кыттааччылаах сахалыы диктант күнэ оскуола кэмнэрин санааһыннаах, бэрт сэргэхтик уонна өрө күүрүүлээхтик ааста.
Нахараҕа 54 киһи диктааны суруйда. Онон, администрация үлэһиттэрин бүттүүн кытыннаран нэһилиэктэргэ саамай элбэх киһини хабан бэрт сэргэхтик түмпүт библиотекарбыт Ирина Дмитриевна Никанорова бу тэрээһин бастыҥа буолла.
Диктаны суруйуох иннинэ үгүс нэһилиэктэр Ийэ тыл күнүн чэрчитинэн обзордары, литературнай викториналары тэрийдилэр.
Библиотекардар тэрээһиҥҥэ нэһилиэк баһылыктара, администарция, тэрилтэлэр тутаах үлэһиттэрэ, ветераннар, пенсия саастаахтар, эдэр ыччаттар үөрэ-көтө кыттыбыттарын кэпсээтилэр. Ол курдук Төҥүлү баһылыга Анатолий Петрович Плотников, Телигигэ баһылык Михаил Михайлович Денисов уонна оскуола директора Николай Прокопьевич Пахомов, баһылык солбуйааччылара Төхтүргэ Пермякова Л.Н., Догдоҥоҕо Павлова И.К. суолта биэрэн, дьону-сэргэни көҕүлээбиттэрин астына аҕыннылар.